Ciongnie nas na zachod

Moi Miyli!
 
Zaprosiyli mie, żeby napisać coś do „Nowin Wodzisławskich”, jako mi się udo nie wiym, bo dziynnikarzym ech ni ma, ale pisać i godać trocha poradza.
 
Roztomańte rzeczy (zresztom bardzo ważne) dziejom się na świecie. Dość dłogo dziynki Bogu żyja i co jo już się to wszystkigo nie nasłochała. Swady i ostudy na całym świecie moc, nikiedy se myśla czy to już nie bydzie inakszy? Dobrze że w telewizorze nikiedy puszczom coś weselszego, niedowno oglondali my angielsko krolowa Elżbieta (poznać że krolowa – jest piykno) oglondali my jom bo miała urodziny – mo piykny wiek prawie jak jo ale kaj mie tam do nij. Krolowa tak rychtyk swój birsthday przełożyła na czyrwiec jak bydzie ciepło. My to se tak najwyżyj z piontku na niedziela przełożymy – bo muszym patrzeć roboty. Elżbieta to bardzo zocne miano. Jak se tak spomna to i w Polsce som ważne i mondre babki co noszom taki miano. Szkoda, że teraz jest mało dzieci z tym mianym.
 
Oglondom tych „nowinowych noworodkow”, ale coroz bardzij widza i czytom, że jednak ciongnie nas na zachod. Ludzie myślom, że jak bydzie mioł tyn mały zagraniczne miano, (to choćby sie Strzebrzeszyn na nazwisko zwoł bydzie docyniony). Dobrze, że jeszcze w Polsce momy Lecha, Leszka, Kazimierza, to możno nas ta zagranica nie zaleje.
 
Bo mie się zdo, że Elżbiety, Elzy, Elki, majom fajne miano – dyć i Sztefan z „M jak miłość” wybroł se Elka, a jak jom wzion do Niymiec może se jom mianować Lizbeth, ale to też bydzie Elka. Jak już tak o mianach, to jeszcze się u nas trefi jaki Franciszek, Jerzy, Stanisław ale to tak dowajom z pamiynciom po starzikach. Som małe Jadzie, Matyldy, Anny, Anielki , Marysie, nikiere som też „z telewizora”.
 
Downij jak starsi godajom miana brało się z kalyndorza, jaki świynty był w tym dniu ja się dziecko urodziyło- tak go ojcowie ochrzciyli. Zostało jeszcze dużo takich, co na swoi miano przezywajom, jak jeszcze ojcowie żyjom to im majom za złe – kaj żeście po taki miano zaszli – to mosz synku z kalyndorza – powiado matka. Piyknie! A teraz moim mianym garce baby myjom! A czy to tam wtedy wiedzieli, że przidom taki czasy…