Czy tymu nie bydzie końca?

Jaki zły duch gorzołka wymyślył?

 

Dzisiej byda pisać o ruchu na drogach i tych strasznych wypadkach, kiere się co chwila zdarzajom. Bez gwary by się to pisało: „Jestem wstrząśnięta ogromem nieszczęść spowodowanym przez lekkomyślnych kierowców”.

 

Ni ma jednego dnia, coby nie słuchało się o zabitych, sromotnie łokaleczonych niewinnych dzieciach i starszych.

 

Jaki zły duch (bo to też łon chyba gorzołka wymyślył) dowo do rynki kiero dzierży kierownica, siekiyra, żeby zabijoł. Żeby niemowlontko skirz ożartego kierowcy musieli retować w lazarecie? Czy to nas już dosiyngła ósmo najciynżejszo ploga? Dyć to chnet bydymy tych zabitych równać z tymi w Iraku! Ku tym wszystkim szolonym autom (mom rzec kierowcom) doszły motorcykle. Boże! Co te nieurosnyte samobójce abo jak to nikierzi godajom „dawcy narządów” wyczyniajom. Szczynśliwi ci, co nie miyszkajom blisko tak zwanej drogi przelotowej. Jako pryndkość mo taki szoloniec co mu nie idzie ani w dziyń numeru rejestracyjnego odpisać?

 

Nasze drogi som poznaczone krzyżami, ale to ni tak wszystki skirz pobożności, jyno skirz ludzkich tragedji. Przikładów jest moc: Córeczka co w niedziele miała iść do I Komunije w sobota straciyła ojca. Licealiści po zdaniu matury z rozpyndym wpakowali się we czwórka do krzipopy... pod most. Krziż kole boiska to kolejne stracone młode życie. A wiela się ich ku uciesze diobła potopiyło? Ginom artyści, szportowcy i choć nie som nietrzyźwi, bo tak nie godom - wielko szkoda młodego życio... Rozpacz tych co zostali i kierzi nie umiom zapomnieć jest nie do pojyncio.

 

Tysionce policjantów, radarów wszystko na darmo, gupota odbiere rozum a potym notatka - wypadek - zabił i „uciekł z miejsca wypadku”. Czy tymu nie bydzie końca?

 

Jakiś światełko już się za sprawom Ministra Zbigniewa Ziobro pokazuje! Piyrsze narzyndzi zbrodni, jak to nazwano, już zostało sprawcy wypadku zebrane. Jeźli policja ku odebranymu prawu jazdy bydzie zabiyrać i narzyndzi zbrodni, to choćby ich jyno dziesiynć wziyna to na drogach bydzie dziesiynć trumiyn myni.

 

Tym kierowcom po kieliszku, trzabyłoby na szybie auta przilepić trupio czaszka abo transparynt „jada zabijać”!

 

Kieby tak jeszcze chocioż posłuchli farorzów i biskupów, kierzi przipominajom, że pionte przikazani godo „nie zabijaj” byłoby myni siyrot i wdów.

 

Dzisio nie napisza nic do śmiychu, bo obraziyłabych te wszystki zrozpaczone rodziny, kiere trzynsoncymi rynkami niesom na miejsce kaj skończyło się ich szczyńści kolejny znicz.

 

Wszystkim okaleczonym we wypadkach ofiarom, życza powrotu do zdrowio, osiyroconym ukojynio w bólu, a wszystkim kierych nieszczyńści spotkało życza, coby umieli sprawcom tych nieszczyńść przeboczyć.

 

Ślązaczka Aniela