Kefir lepszy jak wszystki krymy

Siyrpniowe chyca (gorąca) przipomniom se na pewno mój i rowniocy, jak my - aż gańba się prziznać tymu zacofaniu - robiyły przi żniwach. Chłopy siykły (kosili) a my ubiyrały i wionzały snopki. Co to była za utropa! Na głowie chustka, ale na rynkach bluza z długim rynkowym, bo łostre źdźebła słomy dropały do kwie. Z czasym to się wszystko polepszyło, były maszyny, kombajny, ale to co my jako młode dziołchy robiyły - pamiyntomy. Z tych długich bluzów, kiere też parzyły, był jedyn profit - pleca się nie spolyły i jyno z czornej gymby i z nosa ślazowała skóra. Jak już tak kiery nie umioł przetwać tego chycu i koszula seblyk - ja! To na wieczór przidała się prziniesiono z pywnice kiszka (zsiadłe mleko). Ryncznik z kiszkom prziłożony na pleca ziombiył, że aż bolało, ale potym prziszła ulga. To było downo, ale żech już jest staro to skirz tego, że starzi radzi spominajom stare dobre, choć ciynżki czasy to jo też pospominała.

 

Teraz też som dlo nikierych ciynżki w goroncu roboty. Budowlańce, drogowcy, hutnicy, piekorze, no i dużo inkszych kierych ta robota przimuszo, że muszom tak trwać. Urzyndnicy co robiom przi komputerach, muszom dować pozór coby się komputery nie przegrzoły i nie przestały za nich myśleć. Taki wysiednyty komputer umi położyć tego biydnego komputerowca na łopatki, kiej maszyna straci pamiynć a tego kiery jom obsługuje trefio szlag.

 

Jedni co som przi piniondzach wyjyżdżajom podziwiać inksze słońce, te majorkowe, abo adriatycki. Ci to muszom nabrać pełno tasza roztomańtych krymów ,nejlepszy, takich co zaroz bydom bronotni. Nikierzi na taki wyjazd muszom brać pożyczka, co to ich teraz dużo reklamujom.

 

Tych co zostowajom doma, młode na dorobku rodzinki no i starych, upominajom dochtory i gazety, żeby tych malutkich z tom biolutkom, słabom skórkom nie wykludzać na słońce, bo takigo malika i rozgrzoty wiater oparzy. A starzi ja! Łoni to poradzom być spórni, muszom wylyźć na dwór a potym to już chnet po sztyrech, by musieli do chałupy się przismyczyć, bo chyc i duchota prziklapujom tam te wszystki żyły, co majom pomóc dychać. Pić to się mo kole dwa litry na dziyń. Jak się tyn istny poci to te dwa litry smoże. Mo się jeść dużo zielyniny, to jest dobro rada, no bo miynso to bez lato wcale nie szmakuje. Wynodli taki marchewkowy sok dlo dzieci, ale dyć zaś jedni godajom, że za dużo karotynu też ni ma dobrze, tóż możno trza z umiarym. Widziałach piykno dwuletnio blondyneczka, kiero jak dostała na urodziny cało zgrzywka Kubusia, tak piyła, że za dwa tydnie skórka na gymbie prziciymniała. To jednak tyn karoten.

 

Na dorada wszystkim za fest opolonym to tela: trza mieć w doma maślonka abo kefir, pomogom lepszy jak wszystki krymy.
Tym co im szkodzi goronc, życza zdrowio i pogodzynio się z tym. (To mo być pisane po rosyjsku)„ ...pust wsiegda budiet sołnce, pust wsiegda budiet nieba, pust wsiegda budiet mama, pust wsiegda budu ja Spasiba.

 

Ślązaczka Aniela