Aniela Langer

Do orkiestry znojdzie sie mały bymbynek, wtedy uciechy moc. Teraz coroz czyńścij zaglondajom na tyn bymbynek i poznowajom do kogo je bardzij podany.

 

Małżyństwo idzie przyrownać do orkiestry abo chóru. Wszyscy wiedzom, że małżyństwo zaczyno się od duetu: przodź som dwa - on i ona. Nejprzod piyknie se oba śpiywajom jak z nut, bo som młodzi, potym ona dzierży nuty a on śpiywo, nikiedy zafałszuje, a to już je źle, bo ona zaczyno mieć „cicho mszo” i o duecie ni ma mowy. Nikiedy zacznie grzmieć, trocha popadze, ale chnet jak to po burzy zaświyci słońce no i zaś jest duet. Po burzy dycko bywo czyściejszy luft i głosy w duecie som zgrane ani nie trza nut.

 

Do orkiestry znojdzie sie zaniedłogo mały bymbynek, wtedy uciechy ogromnie moc. Teraz coroz czyńścij zaglondajom na tyn bymbynek i poznowajom do kogo je bardzij podany.

 

Ona żeby mu się przichlybić godo „cały tata”. Potym przibydom jeszcze dwie piszczołki. To by już tak był taki familijny kwintet!

 

Jedyn chłop posłoł swoja babka na wczasy, jak przijechała, był bardzo rod i tak se piyknie pogadowali naroz on się pyto: ”a byłaś mi tam wierno?” a baba na to: ”tak jak ty mie chłopeczku!” teraz się chłop wnerwiył i wrzeszczy: Już mi tam na żodne wczasy nie pojedziesz!” .A jak potym on do sanatorium jechoł to mu poradziyła: ”a nie udowej piniyndzy na to co mosz w doma”.

 

Opowiadoł mi ujec co też był na wczasach w gorach taki przipadek. Spotkoł przed chałupom ogromnie markotnego gorola, siedzioł borok i tak się jakoś dziwnie kiwoł. Co wom to Gazdo? - pyto się ujec, mocie jako starość? A kiwom się, kiwom, wczoraj byłek z Marychnom na weselu, trzi razy mi jom od tańcowanio wziyni, jo żem po pysku dostoł a ona mi się dzisiej na poprawiny wybiyro.

 

Chłopy też majom roztomańte mankulije skyrz swojich bab. Roz przi piwie godo Antek Franckowi, co mioł gryfno babka:”Wiysz Antek jak jo ta twoja Maryjka widza to musza se zerzykać: „i nie wódz nas na pokuszyni” a Antek na to: ”a jakbyś jom mioł to byś rzykoł ale nas zbaw ode złego.” Ja, nie wszystko złoto co się świyci.

 

Som jeszcze taki małżyństwa, co przeżyły ze sobom 50 lot. Jednego takigo jubilata spytali sie co oni robiyli, że dożyli takigo jubileuszu. On pado: „jo trzimia dziub, a ona piniondze i wszystko gro”.

 

Nikierzi sie za niedłogo po weselu zaczynajom wadzić, przezywać od starych maupic i gupich baranów, ona wystawio mu kufry za dźwiyrze, on od nij odchodzi na zawsze (zdarzo się, że on już odchodziył na zawsze 5 razy ale dycko wracoł, bo kaj je tak dobrze jak u baby), nikiedy je rozwod i dzielyni majontku.

 

Słyszałach jak chłopy opowiadały se o swoich babach po szychcie. Jedyn pado do drugigo: „moja baba jest jak sklep całodobowy-nigdy sie nie zawiyro”. Drugi zaś mu przitakuje i powiado: „a moja jest jeszcze gorszo - jak tako staro Syrynka: jak nie trzaśniesz to sie nie zawrze”

 

Ale tak mi się zdo, że oni som tacy mocni yno w gymbie, bo jak tak nic by my z nimi nie przeżekły to chodzom i się pytajom, czy nom co ni ma, abo czy się co nie stało...

 

Wszystkim Małżyństwom, tym zocnym, co przeżyły piykne jublileusze, tym co jeszcze na rocznice czekajom i tym młodym, co dopiyro, na te małżyński szczyńści (nikiedy gorzki) czekajom, życza coby jak najdłużyj w tym duecie wytrzimali.

 

Ślonzoczka Aniela