Bajtle do szkoły

No i momy wrzesień, a latoś tak trefiyło, że gynał piyrszego bajtle ćisły do szkoły.

No i szły bajtliki z tytami, yno powiym wom, że te tyty były chned wjynksze łod nich. Ale przeca latoś do szkoły musowo szły bajtle kiere majom przeca 6 lot.

Jo tak ształnuja, czy rychtyk taki bajtel poradzi wysiedzieć cołko lekcjo?  I czy poradzi sie uczyć? Jak łon przeca durch chce sie bawić i tyrać. A we szkole trza siedzieć i słuchać rechtorki.

Reforma reformom, yno czy wtoś to tak do końca przemyśloł? Przeca taki bajtel, to ani nie poradzi usmyczyć tyj wielej pukeltasze. A dzisio tych heftow i książek majom moc.

Do tego myślyni sześciolatka je roztomańte- łon by tak bardzi poskokoł po kałużach, a nie siedzioł w doma i sie uczoł.

A jeszcze co mie mierzi, to to, że te bajtle som pofyrlane wiekowo.

Wiadomo, że inakszy sie uczy take maluchy, a inakszy dziecka starsze. A jak niy, to je rychtyk mały miszmasz.

Jo se tak myśla, że dobrze by było, keby te maluszki miały choć te wszyski książki we szkole, a yno hefty brały du dom. Wtedy chocioż ta pukeltasza była by lekszo.

Nie wiym mono moji myślyni je gupi, ale czas nom pokoże czy miołech recht czy niy. Pyrsk!

Heft - zeszyt

Pukeltasza - plecak szkolny

Gnał - akurat

Ształnuja - myślę