Ludzie jak cielynta
Felieton Remigiusza Rączki
Wiycie z ludziami terozki dzieje sie coś nie echt. A już godom czymu.
Niby som my katolickim narodym, cożkej z tom praktykom je już roztomańcie. Bezmałaś yno już 40% ludzi praktykuje, a we statystykach aże 98% je niby katolikami. Ale nie ło tym chca kludzić.
Mie sie rozchodzi ło to, że jak już ida do kościoła, toż ech tam je duchym i ciałym, odpowiadom, śpiywom. A nie stoja jak mumio egipsko, ani be ani Ce i Pon Boczka robia za błozna. Ale i to mie jeszcze nie szteruje. Nojbardzi mie wnerwio jak ludzie nie umiom sie we kościele zachować.
W niedziela bołech na mszy, po kierej było wystawiyni najświyntszego sakramyntu. Wy myślicie, że ludzie poklynkali, jak faroż go wyciongnoł z tabernakulum. A kaj, łoni sie zwyrtli na piyncie i picha z kościoła. Bodło mie to niemożliwie.
A jak już widza chrzciny i żodyn nie wiy w kierym momencie sztartnyć na ofiara, yno sie dziwajom jedyn na drugigo i idom jak cielynta, kiere czimajom sie blisko cycka łod krowy, to mie krew zalewo.
Musza wom pedzieć, że źle sie dzieje. Roztomańte gupoty ludzie majom opanowane perfekt, a to co sie noleży żodyn nie wiy jako szafnyć. Jo wiym, świata już nie zmienia, ale dycki moga ło tym napisać, co gryzie hanysa z krwi i kości. Pyrsk.
Za błozna - w bambuko
Zwyrtnyć - obrucić się
Szafnyć - dać radę
Nie echt - coś nie tak