Niedziela palmowo

Roztomili Ludkowie, kiery do kościoła chodzi to przeca wiy, że tydziyń przed Wielkanocom je Niedziela palmowo. Ale to ni ma tak, że yno została nazwa, bo przeca cza narychtować se szumno palma do poświyncynio. Nejgorszy jak widza te sztuczne kikuty, kiere nie wiym na co som podane. Wedle mie, to tak bydom dobre odmiyść pajonczyny, ale nie żeby s niom iś do kościoła.

A jako mo być prawdziwo palma? Ona musi być przede wszystkim żywo. Nojprzod cza natargać kocianek, złotego deszczu i grinszponu. Potym musi to trefić do wody w doma, żeby trocha puściło (je to fest ważne, jak tak praje trefi wartko Wielkanoc jak latoś). No a potym cza to piyknie powionzać gałonzkom z brzozki i już je palma fertig.

Tako palma cza dać poświyncić w kościele, a jak sie przidzie nazod du dom, to kożdy domownik musi być chocioż ze 3 razy pobiczowany po krzyżu. Bezmałaś mo to dać to, że w krziżu cołki rok nie łupie. Potym palma cza jeszcze zostawić, bo we śmiergust cza z ni zrobić krziżyki i w zegrodce abo na polu postyrkać w rogach. Mo to dać urodzaj i chronić przed kaj jakom plagom.

Jak widzicie tako palma, nojzwyklejszo na świecie, a mo tela przeznaczyń.

Kochani Ludkowie, mocie jeszcze pora dni, bez to jak sie fechtniecie, to mono jeszcze zdążycie z latosiom palmom. Cza wracać do tradycje i do mądrości naszych przodkow, bo to je nasze dziedzictwo i my sami. Czimejcie się, do prziszłego tydnia, Pyrsk!

Podane – podobne

Kocianki – bazie

Złoty deszcz – forsycja

Grinszpon – bukszpan

Śmiergust – śmigus dyngus

Styrkać – wkładać

Fechtniecie – pośpieszyć