Coż też zrobić z polskimi jabkami?

Wiycie nikiedy jak sie dziwom na pudło i to co tam godajom, toż mie pieron biere. Polsko, państwo kaj je nos praje 40 milionow, a z owocami ni ma co robić. Rusy nie chcom naszych jabek i wielko tragedyjo. A jak sie idzie do sklepu, toż biyda kupić polski jabko, bo fol je unkszych ze Holandie czy Hiszpanie. Nie poradza tego zrozumieć.

Przeca jak momy jabka, toż idzie ich przerobić na apfelmusy, soki, kiere bez zima szmakujom pierońsko dobrze.

Czamu rząd nie wprowadzi programu do szkoł- kożdy bajtel dostowo dziynnie jabko?

Bramki na autobanie na weekendy umieli łotworzyć i stracić pora milionow, a z jabkami majom problym. Przeca idzie machnyć kampania społecznościowo- jydz szarlotka, czy kołocz z jabkami, bo przeca to je naszo tradycjo, a ku tymu retnymy naszo gospodarka.

Jo nie widza w tym problymu.

Przeca owoce idzie poskupować łod sadownikow i przepuścić na sznapsy. Myśla, że u nas ze zbytym tego nie było by problymu.

Podle mie problymym je to, że kożdy yno chce sie uczimać na stołku tam na wiyrchu, a to co na dole średnio ich interesuje. Mydlom nom oczy jakimis gupotami, a poważne rzeczy zamiatane som pod tepich.

Jo mom yno tako nadziejo, że w końcu kieryś się za to weźnie i zrobi porządek. Pyrsk!

---

Apfelmus – mus jabłkowy

Autobana – autostrada

Retnyć – poratować, wspomóc

Sznaps – mały kieliszek wódki

Tepich – dywan