Gastronomiczny Wodzisław

Nikandzi godajom, że we Wodzisławiu nic a nic sie nie dzieje. A jo by padoł, że je blank inakszy. Bo we sztwortek dzioło sie fest ale gastronomicznie.

Do Ekonomika kaj robia, sjechały sie drużyny z cołkigo Ślońska, Czech i Tczewa skuli Ślońskij Jesiyni Kulinarnej, kiero robiyli my już czworty roz.

A ło co idzie w tym konkursie? A ło to żeby uważić cosik dobrego, z tego co sie dostanie i jeszcze piyknie to narychtować na talyrz. Latoś były pstrągi, łoński rok karminadle, a jeszcze pryndzy karczek i gynś.

Powiym wom, że nikiere pstrągi, a właściwie, to co ś nich zrobili rychtyk mie haltły.

A jedli my ryba w cieście francuskim, z orzeszkami pinii, z baniom, makiym i jeszcze unksze. Szmakowało super, choć ryby rychtowały młode łepki ze szkoły, ale za to z jakim pomysłym.

Wygroł pstrąg kiery nie yno, boł dobry, ale ku tymu oryginalnie narychtowany ( w takij misce z glyjtom jak za starego piyrwej).

I ło to chodzi, żeby kombinować i z rzeczy kiere znomy wymłodzić cosik blank inszego, a ku tymu było to fest dobre. Tak też było.

Ale nojważniejsze w tym konkursie je to, żeby zachyncić tych łepkow do roboty i pokozać, że dycki sie spłaci. Piykne je tyż to, że mogymy sie spotkać, podżistać, powymiyniać receptami i to je chyba podle mie nojważniejsze.

Już czakom na nastypny roz i myśla, jaki ciepna tymat na bezrok. Pyrsk

Haltnyć – zaskoczyć

Bania – dynia

Narychtowany – podany

Dżistać – rozmawiać